Хууль зүйн тайлбар толь

хөвөлтөд тохирсон

тухайн төрөл, зориулалтын хөлөг онгоц экологи, аюулгүйн болон техникийн дүрмийн шаардлага хангасан, аюулгүй аялахад зайлшгүй шаардлагатай бүрэн бүрэлдэхүүнтэй мэргэжлийн баг, бүх төрлийн нөөц, тоног төхөөрөмжөөр хангагдсан байдал

Далай ашиглах тухай хууль, 1999 он, 4.1.5

хөдөлгөөний үндсэн зарчмууд

энэрэнгүй, шударга, төвийг сахих, бие даах, сайн дурын, нэгдмэл, түгээмэл байх олон улсын улаан загалмай /улаан хавирган сар/ хөдөлгөөний үндсэн зарчмууд

Монголын улаан загалмайн нийгэмлэгийн эрх зүйн байдлын тухай хууль, 2000 он, 3.1.2

хөдөлмөрийн ганцаарчилсан маргаан

хөдөлмөрлөх эрх, түүнтэй холбогдсон хууль ёсны ашиг сонирхлын хүрээнд хөдөлмөрийн гэрээний талуудын хооронд үүссэн саналын зөрүү

Хөдөлмөрийн тухай хууль, 1999 он, 3.1.8

хөдөлмөрийн гэрээ

нэг талаас ажилтан нь ажил олгогчоос хуульд нийцүүлэн тогтоосон хөдөлмөрийн дотоод журмын дагуу тодорхой ажил гүйцэтгэх, нөгөө талаас ажил олгогч нь ажилтанд хөдөлмөрийн үр дүнд тохирсон цалин хөлс олгох, хууль тогтоомж болон хамтын гэрээ, хэлэлцээрт заасан хөдөлмөрийн нөхцөлөөр хангах тухай харилцан үүрэг хүлээсэн тохиролцоо

Хөдөлмөрийн тухай хууль, 1999 он, 3.1.3

хөдөлмөрийн хамтын маргаан

хамтын гэрээ, хэлэлцээр байгуулах, биелүүлэх, биелэлтэд нь хяналт тавих явцад гэрээ, хэлэлцээрт оролцогч талуудын хооронд үүссэн саналын зөрүү

Хөдөлмөрийн тухай хууль, 1999 он, 3.1.9

хөдөлмөрийн хөлсний доод хэмжээ

тодорхой боловсрол, тусгай мэргэжил үл шаардагдах энгийн ажил гүйцэтгэсэн ажилтанд олговол зохих хөлсний хамгийн бага хэмжээ

Хөдөлмөрийн хөлсний доод хэмжээний тухай хууль, 1998 он, 3.1

хөдөлмөрийн хэвийн бус нөхцөл

хөдөлмөрийн аюулгүй ажиллагаа, эрүүл ахуйн шаардлагын хүрээнд сөрөг нөлөөллийг нь арилгах боломжгүй, хөдөлмөрийн стандартад нийцээгүй ажлын байрны нөхцөл

Хөдөлмөрийн тухай хууль, 1999 он, 3.1.10

хөлөг онгоц

далай ашиглах үйл ажиллагаа явуулахад зориулагдсан хөдөлгүүртэй буюу хөдөлгүүргүй инженерийн хөвөгч байгууламж

Далай ашиглах тухай хууль, 1999 он, 4.1.1

хөнгөмсгөөр найдсан

гэмт хэрэг үйлдсэн этгээд өөрийн үйлдэл, эс үйлдэхүйн нийгмийн аюулын шинж чанарыг ухамсарлаж, түүний улмаас нийгэмд аюултай хор уршиг учрах боломжтойг урьдчилан мэдсэн боловч түүнийг гаргахгүй байж чадна гэж тооцон үйлдсэн

Эрүүгийн хууль, 2002 он, 27.2

хөрөнгө оруулалтын гэрээ

хуулийн этгээд байгуулахгүйгээр тодорхой төсөл хэрэгжүүлэх зорилгоор байгуулсан концесс, бүтээгдэхүүн хуваах тухай, маркетинг, менежмент, санхүүгийн түрээс (лизинг)-ийн болон франчайзийн хэлбэрийн хөрөнгө оруулалт хийх хэлцэл

Гадаадын хөрөнгө оруулалтын тухай хууль, 1993 он, 3.4

хөрсний үржил шим

ургамал ургахад шаардагдах чийг, шим тэжээлийн бодис, агаар, дулаан, биологи, физик-химийн орчинг буй болгогч хөрсний чадавхи

Тариалангийн тухай хууль, 2004 он, 3.1.4

хөрш залгаа эд хөрөнгө

хоёр талаасаа харилцан нөлөөлж болох хил залгаа эзэмшил газар болон бусад үл хөдлөх эд хөрөнгө

Иргэний хууль, 2002 он, 127.1

Хөтөлбөр

Аливаа ажил хэрэг, салбарын хөгжлийн талаарх үзэл баримтлал, бодлого зорилтыг тодорхой хугацаанд хэрэгжүүлэх арга зам, хүрэх үр дүнг урьдчилан төлөвлөж, батлуулсан баримт бичиг

MNS 5140 : 2002

хөтөч-тайлбарлагч

аялал жуулчлалын хөтөлбөрийн дагуу жуулчинд газарчлан, орчуулга, тайлбар хийх хувь хүн

Аялал жуучлалын тухай хууль, 2000 он, 3.1.7

хувийн хамгаалалт

хувийн хамгаалалтын үйл ажиллагаа эрхлэх эрх бүхий этгээд гэрээний үндсэн дээр үйлчлүүлэгчийн амь бие, эрүүл мэндийг гэмт халдлагаас хамгаалахын тулд энэ хуулиар зөвшөөрсөн үйл ажиллагаа явуулах

Хувийн хамгаалалтын тухай хууль, 2001 он, 3.1.1

хувийн хэргээр удаан хугацаагаар оршин суугч

монгол улсад хувийн хэргээр 90 хоногоос 5 жил хүртэл хугацаагаар оршин суугаа гадаадын иргэн

Гадаадын иргэний эрх зүйн байдлын тухай хууль, 1993 он, 22.6

хувь хүний нууц

монгол улсын болон гадаадын иргэн, харьяалалгүй хүн монгол улсын хууль тогтоомжид нийцүүлэн нууцалсан бөгөөд задруулбал тухайн хүний хууль ёсны ашиг сонирхол, нэр төр, алдар хүндэд илтэд хохирол учруулж болзошгүй мэдээ, баримт бичиг, биет зүйл

Хувь хүний нууцын тухай хууль, 1995 он, 2 дугаар зүйл

хувьцаа

компанид хөрөнгө оруулж, түүнийг үндэслэн хувь нийлүүлэгчдийн хуралд оролцож санал өгөх, ногдол ашиг авах, компанийг татан буулгасны дараа үлдсэн эд хөрөнгийг худалдан борлуулснаас олсон орлогоос хувь хүртэх болон хуулиар тогтоосон бусад эрхийг гэрчилсэн үнэт цаас

Үнэт цаасны зах зээлийн тухай хууль, 2002 он, 3.1.5

хугацаагүй түрээслэн ашиглах

газрын хэвлийг урьдчилан тодорхой хугацаа тогтоолгүйгээр ашиглалтад олгох

Газрын хэвлийн тухай хууль, 1988 он, 19.2

худалдааны төлөөлөгч

үйлчлүүлэгчийн нэрийн өмнөөс, түүний зардлаар гэрээ байгуулах буюу бараа, эрх, үйлчилгээг борлуулахад зуучилж байгаа этгээд

Иргэний хууль, 2002 он, 415.1

Бүх нэр томьёо — 1,091