Хууль зүйн тайлбар толь — нэр томьёоны тодорхойлолт

давтан гэмт хэрэг

энэ хуулийн нэг зүйл, түүний нэг хэсэгт заасан гэмт хэргийг хоёр буюу түүнээс дээш удаа үйлдсэн байх

Эрүүгийн хууль, 2002 он, 18.1

давхар бичилт

ажил гүйлгээг дансны дебет, кредитэд зэрэг бичилт хийх

Нягтлан бодох бүртгэлийн тухай хууль, 2001 он, 3.1.3

давхар даатгал

даатгуулагч сайн дураар хоёр буюу хэд хэдэн даатгалд зэрэг даатгуулах

Иргэний эрүүл мэндийн даатгалын тухай хууль, 2002 он, 3.1.6

давхар даатгалын гэрээ

даатгагч даатгалын эрсдэлийг хариуцах үүргээ давхар даатгуулах төлөвлөгөөг даатгалын багц дүрэмд заасны дагуу Санхүүгийн зохицуулах хороогоор батлуулна.

даатгалын тухай хуулийн 47 дугаар зүйл

давхар даатгалын үйл ажиллагаа

даатгагч нь даатгуулагчийн өмнө хүлээсэн үүргээ бүрэн буюу хэсэгчлэн дахин даатгах

Даатгалын тухай хууль, 2004 он, 4.1.9

дайн бүхий байдал

монгол улсын тусгаар тогтнол, бүрэн эрхт байдалд аюул занал учруулж, зэвсэглэн халдсан улс, түүний холбоотонтой дайн бүхий байдал зарласан мөчөөс түүнийг цуцлах хүртэл харилцах харилцааны онцгой хэлбэр

Дайн бүхий байдлын тухай хууль, 1998 он, 3.1

дайны байдал

Үндсэн хуулийн хорин тавдугаар зүйлийн з дахь хэсэгт заасан нөхцөл бий болох үед төрийн эрх барих дээд байгууллагаас монгол улсын нийт нутаг дэвсгэрт буюу зарим хэсэгт тогтоох улс төр, эдийн засаг, нийгэм, эрх зүйн, цэргийн онцгой дэглэм

Дайны байдлын тухай хууль, 1998 он, 3 дугаар зүйл

дайсан

монгол улсын тусгаар тогтнол, бүрэн эрхт байдал, нутаг дэвсгэрийн бүрэн бүтэн байдалд аюул занал учруулж, зэвсэглэн халдсан улс, түүний энэхүү зэвсэгт халдлагад холбоотон нь болж буй этгээд

Дайн бүхий байдлын тухай хууль, 1998 он, 3.2

дайчилгааны бэлтгэл нөөцийн чөлөөт бүрэлдэхүүн

зэвсэгт хүчний нэгтгэл,ангийг дайчилгааны даалгаврын дагуу нөхөн хангасны дараа үлдэх цэргийн бэлтгэл үүрэгтэн иргэд

Дайчилгааны тухай хууль, 1998 он, 3.1.7

дайчилгааны даалгавар

улс орны эдийн засаг, зэвсэгт хүчнийг дайны байдалд шилжүүлэх бэлтгэлийг хангах зорилгоор энэ хуулийн 8 дугаар зүйлийн 2, з дахь хэсэгт заасан эрх бүхий байгууллагаас төрийн захиргааны төв, нутгийн захиргааны байгууллага, аж ахуйн нэгж, иргэдэд хүлээлгэсэн үүрэг

Дайчилгааны тухай хууль, 1998 он, 3.1.5

дайчилгааны нөөц

зэвсэгт хүчний нэгтгэл, ангийг байлдааны цагийн орон тоонд шилжүүлэхийн тулд дайчлан татахаар төлөвлөсөн төрийн болон төрийн бус байгууллага, иргэний өмчлөлд байгаа зэвсэг, техник, эд хөрөнгө

Дайчилгааны тухай хууль, 1998 он, 3.1.6

дайчилгааны сургалт

төрийн удирдах албан тушаалтны цэргийн бэлтгэл, цэргийн үүрэгтэнтэй хуульд заасан хугацаанд явуулах цэрэг, цэрэг-техникийн бэлтгэл, давтан бэлтгэл

Дайчилгааны тухай хууль, 1998 он, 3.1.3

дайчилгааны сургууль

цэргийн хээрийн сургуульд дайчилгааны бэлтгэл нөөцийн бүрэлдэхүүнийг татан оролцуулах

Дайчилгааны тухай хууль, 1998 он, 3.1.4

дайчилгааны төлөвлөгөө

улс орны эдийн засаг, нийгэм, зэвсэгт хүчнийг дайны байдалд шилжүүлэхийн тулд хэрэгжүүлэх арга хэмжээг цаг хугацаа, байр, үүрэг, хариуцах эзэн, арга хэлбэр, багтаамжаар нь уялдуулан зохицуулж урьдчилан боловсруулсан цогцолбор баримт бичиг

Дайчилгааны тухай хууль, 1998 он, 3.1.13

далд хамгаалалт

хамгаалуулагчийн аюулгүй байдлыг хамгаалах зорилгоор тэдний ажиллаж, амьдарч, байрлаж байгаа орчин, явах зам, чиглэлийн дагуу далд хэлбэрээр зохиож байгаа хамгаалалт

Төрийн тусгай хамгаалалтын тухай хууль, 1995 он, 5.1.4

дангаар өмчлөх сууцны сууцны бус зориулалттай хэсэг

тухайн сууцны гал зуух, ариун цэврийн болон угаалгын өрөө, өрөө хоорондын хонгил, агуулах

Сууц өмчлөгчдийн холбооны эрх зүйн байдал, нийтийн зориулалттай орон сууцны байшингийн дундын өмчлөлийн эд хөрөнгийн тухай хууль, 2003 он, 4.1.5

дархан цаазат газар

байгалийн бүс, бүслүүрийн онцлог, хэв шинжийг төлөөлж чадах унаган төрхөө хадгалсан байдал, шинжлэх ухааны онцгой ач холбогдлыг нь харгалзан байгаль орчны тэнцвэрт байдлыг хангах зорилгоор улсын тусгай хамгаалалтад авсан газар нутаг

Тусгай хамгаалалттай газар нутгийн тухай хууль, 1994 он, 7 дугаар зүйл

дархлаажуулалт

халдварт өвчнөөс сэргийлэх, түүний тархалтыг хязгаарлах,өвчнийг устгах зорилгоор дархлаажуулах бэлдмэл хэрэглэх арга хэмжээний тогтолцоо

Эрүүл мэндийн тухай хууль, 1998 он, 3.1.11

дархлаажуулах бэлдмэл

халдварт өвчний эсрэг өвөрмөц дархлал бий болгохын тулд хэрэглэх вакцин, анатоксин болон сэргийлэх бусад эмийн зүйл

Дархлаажуулалтын тухай хууль, 2000 он, 3.1.8

дархлалын олдмол хомсдол

хүний биеийн дархлалын эсүүд гэмтэж, дархлалын тогтолцоо алдагдсанаар эмгэг, хам шинжүүд илрэх

Хүний дархлал хомсдолын вирусын халдвар, дархлалын олдмол хомсдолоос сэргийлэх тухай хууль, 2004 он, 3.1.2