Хууль зүйн тайлбар толь — нэр томьёоны тодорхойлолт

газар өмчлөх

тухайн газрыг захиран зарцуулах эрхтэйгээр хуулиар зөвшөөрсөн хүрээнд өөрийн мэдэлд байлгах

Газрын тухай хууль, 2002 он, 3.1.2

газар эзэмших

газрыг гэрээнд заасан зориулалт, нөхцөл, болзлын дагуу хуулиар зөвшөөрсөн хүрээнд өөрийн мэдэлд байлгах

Газрын тухай хууль, 2002 он, 3.1.3

газар эзэмших эрхийн гэрчилгээ

энэ хуулийн дагуу монгол улсын иргэн, аж ахуйн нэгж, байгууллагын газар эзэмших эрхийг баталгаажуулсан баримт бичиг

Газрын тухай хууль, 2002 он, 3.1.7

газрыг чөлөөлөх

тухайн газрыг эзэмших, ашиглах эрх дуусгавар болох, түүнчлэн газрыг зөвшөөрөлгүй ашигласан бол уг газар дээрх барилга байгууламж, бусад эд хөрөнгийг шилжүүлэх, газрыг засаж тохижуулах зэргээр хууль болон гэрээнд зааснаар газрыг өмчлөгчид нь эргүүлэн өгөхөд саадгүй болгох

Газрын тухай хууль, 2002 он, 3.1.5

газрын зураг

газрын гадаргын бодит зүйлийг хавтгайд тодорхой тусгаг, масштабт оруулан томъёолсон тэмдгээр дүрсэлсэн

Геодези, зураг зүйн тухай хууль, 1996 он, 3.1.3

газрын кадастр

газрын нэгдмэл сангийн тоо бүртгэл, газрын улсын бүртгэл эрхлэх үйл ажиллагаа

Кадастрын зураглал ба газрын кадастрын тухай хууль, 1999 он, 3.1.8

газрын кадастрын судалгаа

газрын кадастрыг эрхлэхэд шаардлагатай мэдээллийг шалган нотлох, бүрдүүлэх, судлах, үнэлэх зорилго бүхий үйл ажиллагаа

Кадастрын зураглал ба газрын кадастрын тухай хууль, 1999 он, 3.1.13

газрын мэдээллийн сан

газрын нэгдмэл сангийн мэдээлэл, өгөгдөлд боловсруулалт хийх бололцоотой техник, технологид үндэслэсэн төр, аж ахуйн нэгж, байгууллага, иргэний хэрэгцээг хангахуйц системчлэгдсэн өгөгдлүүдийн цогц

Кадастрын зураглал ба газрын кадастрын тухай хууль, 1999 он, 3.1.15

газрын нэгдмэл сангийн тоо бүртгэл

газрын нэгдмэл сангийн тооллого, газрын чанарын болон эдийн засгийн үнэлгээний үр дүнг тусгасан мэдээллийн цогц үйл ажиллагаа

Кадастрын зураглал ба газрын кадастрын тухай хууль, 1999 он, 3.1.9

газрын нэгдмэл сангийн тооллого

газрын нэгдмэл сангийн үндсэн, дэлгэрэнгүй ангиллын газрын байршил, хил зааг, тоо, хэмжээг тодорхойлох цогц үйл ажиллагаа

Кадастрын зураглал ба газрын кадастрын тухай хууль, 1999 он, 3.1.10

газрын тос

газрын хэвлийд байгаа шингэн тос, хий болон хатуу байдалтай хамтад нь буюу дангаар нь олборлож болох нүүрс-ус төрөгчийн төрөл бүрийн нэгдэл

Газрын тосны тухай хууль, 1991 он, 2.1

газрын тосны хэрэг эрхлэх байгууллага

БНМАУ-ын засгийн газраас газрын тостой холбогдсон үйл ажиллагаа явуулах тухай гэрээ байгуулах, түүний биелэлтэд хяналт тавих эрх олгосон байгууллага

Газрын тосны тухай хууль, 1991 он, 2.3

газрын тостой холбогдсон үйл ажиллагаа

газрын тос хайх, хамгаалах, олборлох, боловсруулах, тээвэрлэх, хадгалах, борлуулах ажиллагаа

Газрын тосны тухай хууль, 1991 он, 2.2

газрын төлөв байдал, чанарын улсын хянан баталгаа

газрыг үр ашигтай, зохистой ашиглах, хамгаалах үйл ажиллагаанд төрийн хяналтыг тасралтгүй хэрэгжүүлэх зорилгоор газрын төлөв байдал, чанарын тогтвортой, гол үзүүлэлтүүдийг хууль тогтоомжид заасан хугацаанд давтан тодорхойлж улсын хяналтад авсан анхны үзүүлэлтүүдтэй харьцуулан дүгнэлт гаргах

Газрын тухай хууль, 2002 он, 58.1

газрын улсын бүртгэл

тодорхой хил заагаар бусад газраас тусгаарлагдсан аж ахуйн нэгж, байгууллага, иргэний эдлэн газрыг эзэмших, ашиглах эрх, түүний шилжилтийг бүртгэж, баталгаажуулах үйл ажиллагаа

Кадастрын зураглал ба газрын кадастрын тухай хууль, 1999 он, 3.1.14

газрын хэвлий

хөрснөөс доош газрын гүн рүү үргэлжлэх орон зай, түүнийг эзлэн орших материаллаг бүх зүйлс /бүх төрлийн чулуулаг, ашигт малтмал болон геологийн бусад биет, түүнчлэн барилга байгууламж/

Газрын хэвлийн тухай хууль, 1988 он, 4.1

газрын чанарын үнэлгээ

газрыг түүний төлөв байдал, чанарыг илэрхийлэх үзүүлэлтээр харьцуулан үнэлэх үйл ажиллагаа

Кадастрын зураглал ба газрын кадастрын тухай хууль, 1999 он, 3.1.11

газрын эдийн засгийн үнэлгээ

газрыг түүний чадавх, эдийн засгийн үр өгөөжийг илэрхийлэх үзүүлэлтээр харьцуулан үнэлэх үйл ажиллагаа

Кадастрын зураглал ба газрын кадастрын тухай хууль, 1999 он, 3.1.12

гал түймрийн гамшиг

объектын болон ой, хээрийн гал түймэр өргөжин дэлгэрч олон хүний амь нас, эрүүл мэнд хохирох, байгалийн баялаг, эд хөрөнгө их хэмжээгээр сүйрэхэд хүргэх нөхцөл байдал

Галын аюулгүй байдлын тухай хууль, 1999 он, 3.1.2

гал түймэр

хүний амь нас, эрүүл мэнд, хувь хүн болон хуулийн этгээдийн эд хөрөнгө, байгалийн баялаг, нийгэмд хохирол учруулах шаталт

Галын аюулгүй байдлын тухай хууль, 1999 он, 3.1.1