Хууль зүйн тайлбар толь — нэр томьёоны тодорхойлолт

баривчлах, цагдан хорих шийдвэрийг биелүүлэх үндэслэл

гагцхүү ЭБШ хуульд заасан үндэслэл, журмын дагуу эрх бүхий албан тушаалтнаас гаргасан захирамж, тогтоол нь баривчлах, цагдан хорих шийдвэрийг биелүүлэх үндэслэл болно.

сэжигтэн, яллагдагчийг албадан саатуулах, цагдан хорих шийдвэрийг биелүүлэх тухай хуулийн 4 дүгээр зүйл

барилга байгууламжийг байнгын ашиглалтад оруулах комисс

Энэхүү комиссыг улс, бүс нутаг, орон нутгийн ач холбогдол, үйлчлэх хүрээнээс нь хамааруулж Ерөнхий сайд, ЗГ-ын гишүүн, аймаг, нийслэл, сум, дүүргийн Засаг дарга томилно.Комиссыг барилгын техник хяналтын улсын байцаагч толгойлж болох бөгөөд комиссын бүрэлдэхүүнд байгаль орчин, эрүүл ахуй, гал түймрийн хяналтын албаны төлөөлөгч орно.

барилгын тухай хуулийн 15 дугаар зүйл

барилга, байгууламжийн ажил

барилга байгууламж барих, өргөтгөл шинэчлэлт, их засвар хийх, эсхүл хүн хүч, машин техник, тоног төхөөрөмж, материал, технологийг хослуулан ашиглахад хүргэж байгаа бусад ажил

Төрийн болон орон нутгийн өмчийн хөрөнгөөр худалдан авах бараа, ажил, үйлчилгээний гүйцэтгэгч сонгох журмын тухай хууль, 2000 он, 4.1.15

барилгын материалын үйлдвэрлэл

барилгын материалын эрдэс, түүхий эд олборлох, уурхай ашиглах, материал, бүтээц, эдлэхүүн үйлдвэрлэх үйл ажиллагаа

Барилгын тухай хууль, 1998 он, 3.1.3

барилгын норм, дүрэм

барилгын асуудал эрхэлсэн засгийн газрын гишүүн баталсан, барилгын салбарт заавал биелүүлэх шаардлага, мөрдөх зарчмыг агуулсан норматив, техникийн баримт бичиг

Барилгын тухай хууль, 1998 он, 3.1.5

барилгын техникийн нөхцөл

барилга байгууламжийн зураг төсөл боловсруулах, барьж байгуулахад шаардагдах дулаан, уур, цэвэр, бохир ус, цахилгаан эрчим хүч, холбоожуулалт, радио дохиоллын холболтын эх үүсвэрийн шийдэл, барилгын үйлдвэрлэлд тавих шаардлага болон байгаль орчин, эрүүл ахуй, гал түймрийн хяналтын албанаас авах зөвшөөрөл

Барилгын тухай хууль, 1998 он, 3.1.7

барилгын үйлдвэрлэл

барилга угсралт, засварын ажил гүйцэтгэх, тоног төхөөрөмж суурилуулах үйл ажиллагаа

Барилгын тухай хууль, 1998 он, 3.1.2

барилгын чанарын баталгаат хугацаа

барилга байгууламжийг ашиглалтад хүлээн авснаас хойш түүний чанар, найдвартай байдлыг барилгын гүйцэтгэгчээс хариуцах хугацаа

Барилгын тухай хууль, 1998 он, 3.1.6

баталгаажуулалт

бүтээгдэхүүн, тогтолцоо нь тогтоосон шаардлагад нийцэж буйг хөндлөнгийн этгээд бичгээр нотлох ажиллагаа

Стандартчилал, тохирлын үнэлгээний тухай хууль, 2003 он, 3.1.9

баталгаат албан тушаал

улс орны удирдлага, эдийн засаг, нийгмийн үндсэн салбаруудын тогтвортой ажиллагааг хангахын тулд цэргийн дайчилгаанаас чөлөөлж байхаар засгийн газраас тогтоосон албан тушаал

Дайчилгааны тухай хууль, 1998 он, 3.1.9

баталгаат сорт

тухайн бүс нутагт биологи, аж ахуйн нийтлэг болон тодорхой шинжээр шалгарч, сорт сорилтын зөвлөлөөр батлагдан, тариалах сортын нэрсийн жагсаалтанд бүртгэгдсэн сорт

Таримал ургамлын үр, сортын тухай хууль, 1999 онн, 3.1.5

баталгаат хугацаа

үйлдвэрлэгч, худалдагч, гүйцэтгэгчийн бараа, ажил, үйлчилгээний чанар, аюулгүй байдалд гаргаж өгсөн хугацаа

Хэрэглэгчийн эрхийг хамгаалах тухай хууль, 2003 он, 3.1.5

батламж жуух бичиг

тухайн олон улсын гэрээг монгол улсын их хурал соёрхон баталж хууль гаргасныг нотолсон баримт бичиг

Олон улсын гэрээний тухай хууль, 1993 он, 3.4

батлан даалт

байнга оршин суух хаягтай, тодорхой ажил, хөдөлмөр эрхэлдэг, хөрөнгийн эх үүсвэртэй, батлан даагчийн үүргийг бүрэн хүлээх чадвартай, насанд хүрсэн иргэнээс сэжигтэн, яллагдагч, шүүгдэгчийг төлөв томоотой байлгах, хэрэг бүртгэгч, мөрдөн байцаагч, прокурор, шүүхийн дуудсан цагт ирүүлж байхыг хариуцаж, бичгээр үүрэг авах

Эрүүгийн байцаан шийтгэх хууль, 2002 он, 65.1

бие хамгаалагч

энэ хуульд заасан журмын дагуу хувийн хамгаалалтыг тусгай зөвшөөрлийн үндсэн дээр гүйцэтгэх эрхтэй этгээд

Хувийн хамгаалалтын тухай хууль, 2001 он, 3.1.2

биеийн тамир

нийгмийн соёлын бүрэлдэхүүн хэсэг бөгөөд хүний бие бялдрыг хөгжүүлэх, эрүүл мэндийг бэхжүүлэх, хөдөлгөөний идэвхийг сайжруулах зорилгоор оюуны болон материаллаг үнэт зүйлийг бий болгох үйл ажиллагаа

Биеийн тамир, спортын тухай хууль, 2003 он, 3.1.1

биеийн тамир, спортын байгууламж

иргэн, тамирчид биеийн тамир, спортоор хичээллэх, тэмцээн явуулах зориулалттай заал, танхим, талбай

Биеийн тамир, спортын тухай хууль, 2003 он, 3.1.8

биет байдлын доголдолгүй

гэрээгээр тогтоосон тоо, хэмжээ, чанар бүхий эд хөрөнгө

Иргэний хууль, 2002 он, 290.1

биет байдлын доголдолгүй ажлын үр дүн

гэрээнд заасан тоо, хэмжээ, чанарт тохирч байвал

Иргэний хууль, 2002 он, 353.2

биет бус үнэт цаас

тусгайлан хэвлээгүй, бүрдүүлбэр нь тооцоолох машины санах байгууламжид байгаа үнэт цаас

Үнэт цаасны зах зээлийн тухай хууль, 2002 он, 3.1.3